Plataforma ODS Plataforma de Ciencia Abierta para el desarrollo local de los ODS

Plataforma ODS é un proxecto financiado polo Ministerio de Dereitos Sociais, Consumo e Axenda 2030, cuxo obxectivo é promover os Obxectivos de Desenvolvemento Sostible (ODS) a nivel local mediante a cocreación de políticas baseadas na evidencia científica. Para iso, estase desenvolvendo unha plataforma dixital aberta para o seguimento dos ODS a nivel municipal en toda España. A iniciativa inclúe un proxecto piloto na cidade de Pontevedra para impulsar a plataforma, que consta de dúas accións:

UN PROXECTO DE CIENCIA CIDADÁ

Estase levando a cabo un proxecto de ciencia cidadá en centros de ensinanza secundaria de Pontevedra. O persoal docente e o alumnado participan na investigación científica para axudar a aclarar como abordar a crise climática a nivel municipal. O equipo de investigación de Plataforma ODS apoia ás persoas participantes para garantir o rigor de todo o proceso, de modo que os resultados poidan integrarse na plataforma dixital. Deste xeito, estes resultados poderán servir de base para a toma de decisións colectivas. A metodoloxía está deseñada para que poida replicarse noutros lugares e escolas.

UN COMITÉ CIDADÁN POLO CLIMA

O Comité Cidadán polo Clima ten o obxectivo de proporcionar un espazo estable de encontro e diálogo que permita tomar decisións informadas e colectivas. Trátase dunha iniciativa pioneira en Galicia, que busca sentar as bases para unha participación cidadá activa en resposta aos grandes retos do século XXI.

O proxecto piloto levarase a cabo no Concello de Pontevedra, cun grupo de traballo composto por persoas que representen a diversidade da súa cidadanía, incluídos os grupos vulnerables. A través de varias sesións nas que se empregarán metodoloxías participativas innovadoras, o Comité Cidadá polo Clima elaborará propostas de medidas e recomendacións para abordar a crise climática a nivel municipal que servirán de guía para o goberno municipal.

O Comité Cidadá polo Clima é un grupo voluntario de persoas locais que se reunirá mensualmente para debater e presentar as súas suxestións para a elaboración de propostas políticas. Concretamente, este grupo analizará o patrón de consumo de alimentos en Pontevedra e elaborará, con apoio científico, propostas para mitigar os efectos do cambio climático relacionados con este patrón.

Cando falamos de patrón de consumo referímonos, por exemplo, a qué alimentos se consumen en maior medida, onde se mercan, a frecuencia de compra e outros aspectos que poden aumentar as emisións de gases de efecto invernadoiro, agravando así o cambio climático.

Este grupo de persoas reunirase en 5 sesións, nunhas xornadas dirixidas por persoal experto, nas que, de forma dinámica e colaborativa, poderán expor as súas opinións respecto da temática que se vai tratar.

O obxectivo é que este GDL sexa un grupo de traballo con bo ambiente, dinámico e que represente a cidadanía de Pontevedra.